Seni ynjytmaýa

Seni ynjytmaýa

Barsaň bir merdiň ýanyna,

Hergiz seni ynjytmaýa.

Jan goşsaň namart janyna,

Walla, ol hiç ýer tutmaýa.

Her wagtda bir duş geler,

Ýaz ötüp, ýene gyş geler,

Mert elinden çoh iş geler,

Namartdan bir iş bitmeýe.

Panydyr bu dünýä, pany,

Ýokdur hiç kime paýany,

Bedasylyň bir nyşany —

Ýüz görüp, köňül güýtmeýe.

Adam ogly bolsa ysyň,

Barma ýanyna näkesiň.

Bir akylsyz muhannesiň

Hergiz minneti gitmeýe.

Bilgil ömür bibakaňy,

Çirk eýleme hoşlakaňy,

Ajal ger tutsa ýakaňy,

Dadyňa hiç kim ýetmeýe.

Ähli merde derdiň söýle,

Derman andan, umyt eýle,

Beýhuda ýörmegil beýle,

Zyýandyr, peýda etmeýe.

Gül açylar bahar pasly,

Aşyga hoşdur ýar wasly,

Çyn juwanmertligiň asly —

Etdijek lebzin ýutmaýa.

Zerre kim bolsa bagtyndan,

Çoh şalar düşer tagtyndan,

Kaza ýetişen wagtyndan

Bir nepes aňry ötmeýe.

Seýdi, söýle rastyňy,

Hoş gör möwlamyň hastyny,

Bakgyl aýagyň astyny,

Gidejek ýoluň ýitmeýe.

Türkmen şahyry: Seýdi سیدی