Jigi-jigi

Jigi-jigi

Ýar, meniň golumy tutup,

Ýanyňa al, jigi-jigi!

Ýa sen güle-güle ötüp,

Bu ýana gel, jigi-jigi!

Seniň raýyňa garaýyn,

«Gel» diýseň, ötüp baraýyn,

Herne işiňe ýaraýyn,

Goýsa ajal, jigi-jigi!

Rehm edip, bakgyl gözüme,

Bir gülüp bakgyl ýüzüme,

Şu sapar herne sözüme

Etme bedel, jigi-jigi!

Waspyňy ýagşy ýazaýyn,

Her ýerde aýdyp gezeýin,

Yşkyňda daglar gazaýyn,

Bolmasam şel, jigi-jisi!

Ýaryňdyr adamyň pujy,

Ýetişmez bizlere güýji,

Talh agzymy eýle süýji,

Lebleri bal, jigi-jigi!

Hasyl etseň myradymy,

Bereýin hemme zadymy,

Indi syndyrma badymy,

Ýanyma gel, jigi-jigi.

Gözüň süzüp, gaşyň kakyp,

Meni sen öldürdiň ýakyp,

Durma beýle aşak bakyp,

Ýokary gal, jigi-jigi.

Meni bir şat etgin indi,

Myradyma ýetgin indi,

Ýa bu ýerden gitgin indi,

Etme haýal, jigi-jigi.

Eýlegil derdime derman,

Galmasyn köňlümde arman,

Men bolaýyn saňa gurban,

Ýüzleri hal, jigi-jigi.

Bir ýigidiň bagty çapar,

Bar kişiden myrat tapar,

Seýidini sen bir sapar

Goýnuňa sal, jigi-jigi.

سیدی Türkmen şahyry: Seýdi